Mar 242013
 

NAGKAKAISANG TINDIG HINGGIL SA NAPIPINTONG DIGMAAN SA SOUTHEAST ASIAN SEA

 English Transalation

6 June 2012  World Peace Bell,

 

Quezon Memorial Circle, Quezon City, Philippines

 

 

Tapos na ang Impeachment Drama sa senado na matagal na pinagkaabalahan ng gobyerno. Dapat nang pagtuunan ng pansin ng Administrasyong PNoy ang tensyong namumuo sa Scarborough Shoal na mas dapat pagkaabalahan ng gobyerno dahil sa matinding epekto nito sa ekonomiya at mamamayan ng Pilipinas. Tensyon na maaring mauwi sa rehiyunal na digmaan sa Southeast Asia (na maaaring umabot pa sa Asia-Pacific region) dahil sa barumbadong asal ng China ng magpadala ito ng mga modernong warships sa pinagtatalunang dagat. Mas tumindi ang tensyon nang makialam ang US, sa basbas ni PNoy, nang biglang sumulpot, sa di-malamang kadahilanan, ang isang warship nito sa baybayin ng Subic. Ang panungusinti ng US ay lalo pang tumampok ng mangako itong magbebenta ng dalawang pinaglumaan nang warship sa Pilipinas para daw sa “seguridad” ng bansa. Bago ito ay nauna nang nagpadala ng kinakalawang na warship ang Pilipinas sa Scarborough Shoal. At sa mga nagdaang panahon, nagpapadala na rin ng mga sasakyang dagat ang Vietnam, Taiwan, Brunei, at Malaysia dahil ang mga bansang ito ay nakiki-angkin din sa pinagtatalunang bahagi ng Southeast Asian Sea. Kapag hindi napigilan ang military stand-off, lalo na sa pagitan ng China at Pilipinas, malaking epekto nito sa ekonomiya ng mga bansang nagtatalu-talo kung saan direktang apektado ang mamamayan nito, partikular ang mga manggagawa. Mas matindi ang dagok ng digmaan sa Pilipinas dahil ito lamang ang relatibong mahirap na bansa sa mga umaangkin sa Scarborough Shoal.

 

Para sa Stop the War Coalition (SWC), kung matuloy man sa gyera ang namumuong tensyon, ito ay isang gyera ng mga naghaharing uri sa kapitalismong sistema: mga elitistang may kapangyarihan sa burukrasya ng China upang maungusan na nito ang US sa pagdomina sa world economy, mga lokal at internasyunal na kapitalistang nakabase sa Pilipinas na may interes sa yamang-mineral sa shoal, at ang imperyalistang US na gustong mapanatili ang kanilang dominasyon sa ekonomiya ng mundo. Hindi naman lingid sa ating kaalaman na ang malalaking negosyo ng US ay nasa digmaan: pagbebenta ng armas at kagamitang pandigma tulad ng mga lumang warships na ibinenta sa Pilipinas. Kung gayon, ang makikinabang lamang sa pagkapanalo sa digmaang ito ay silang mga elitista rin, habang ang mga mahihirap na mamamayan at manggagawa ay patuloy na papasanin ang dagok ng krisis ng ekonomiya bunga ng digmaan.

 

Ang SWC, bilang isang grupong nagbuklod para sa kapakanan ng mamamayan at manggagawa ng lahat ng bansa sa Southeast Asia ay nananawagan na resolbahin na ang isyung ito sa pamamagitan ng diplomasya at regional unity upang mapanatili ang kapayapaan sa rehiyon. Hindi wasto ang pamamaraan ng Administrasyong PNoy na makipagsabayan ng lakas-militar laban sa China dahil sa totoo lang, wala naman talaga itong “lakas” upang tapatan ang modernong lakas-militar ng China. At lalong kabalintunaan ang paghingi ng tulong-militar sa US dahil taliwas ito sa pambansang soberenya ng Pilipinas na dapat ay malayang resolbahin nito sa sariling inisyatiba ang isyu sa Scarborough Shoal. Ang isali ng Pilipinas ang US sa problema nito sa China ay maliwanag na pagiging dependent ng bansa sa US.

 

Sa pananaw ng SWC, ang diplomatikong negosasyon ay dapat na nakabase sa ekonomikong ganansya ng bawat bansang nagtatalu-talo na kung saan highlighted ang pakinabang ng mamamayan at manggagawa. Dapat alisin ang national barrier sa pagitan ng mga bansa at magkaisang linangin ang yamang-mineral sa Scarborough Shoal. Kung ang China (o alimang bansa na umaangkin) ay may kapasidad na i-develop ang natural resources dahil sa moderno technological industry nito, hayaan na lamang na Pilipinas (na kapos sa technological industry) na sila na ang magproseso ng minerals para maging produkto na magagamit sa industry  ng buong rehiyon. Ngunit dapat makinabang ang Pilipinas sa kita upang maging capital investment ng bansa para naman mapaunlad nito ang sariling industriya, na siya namang magpapasulpot ng isang masiglang ekonomiya at siguradong trabaho para sa mamamayan. Kung sa paanong paraan ito maisasakatuparan, sa diplomatikong negosasyon na pag-aralan.

 

Sa usapin naman ng regional unity, hindi lamang dapat ito nakapatungkol sa pagkakaisa ng mga bansa o liderato ng mga bansa. Dapat ang regional unity ay mas ikinukunsidera ang tunay na representasyon ng mamamayan at manggagawa upang mas maikunsidera sa diplomatic process ang kapakanan at kapakinabangan ng mamamayan at manggagawa at hindi lamang interes ng mga kapitalista sa potensyal na negosyo mula sa yamang-mineral ng dagat. Ito ay para sa international solidarity ng mga manggagawa sa Southeast Asian region. Dito mas mapapatingkad ang tunay na esensya ng demokrasya kung saan ang nagdedesisyon ay ang boses ng nakararami o ng mamamayan. At hindi kailanman papayagan ng masang mamamayan at manggagawa ang digmaan para sa ganansya ng mga elitista. Napatunayan na at pinapatunayan ito ng mga kasalukuyang kaganapan sa buong mundo (Occupy Movements, Arab Spring uprisings, etc.). Ang kapayapaan ay dapat pagpasyahan ng masang mamamayan at manggagawa, at hindi ng mga elitista.

 

Ito ang dapat nating ipanawagan sa araw na ito. Tayong nagtitipun-tipon sa World Peace Bell na simbolo ng pandaigdigang kapayapaan.#

 

 

Stop the War Coalition Philippines

Action and Solidarity for the Empowerment of Teachers ASSERT

Alliance of Progressive Labor

Association of Women for Agrarian Reform Devt. And Empowerment  AWARDEE

CONZARRD.

DAMMMBA

KASAMMAKA

Kilusan Para sa Pambansang Demokrasya

Liga Manggagawa

MAKABAYAN

Mindanao Tri-People Women Resource Center, Inc. MTWRC

Pagkakaisa ng Kababaihan para sa Kalayaan  KAISAKA

Partido Manggagawa

Partido Lakas ng Masa

Peace Women Partners

Philippine Women Network for Peace and Security

SANLAKAS

SCRAP VFA Movement

Socialista Women

WomanHealth

Women’s Education, Devt., Productivity & Research Organization,Inc. WEDPRO

Young Moro Professionals Network

Youth for Nationalism and Democracy

Sanlakas Youth

 

Stop the War Coalition Philippines

Phone/FAX: +63-2-9311153

Mobile: +63-917-8871153

Skype: corafabros

Email: corafabros@gmail.com

 

Small acts, when multipled by millions of people, can transform the world (Howard Zinn)

 

The date posted here is due to our website rebuild, it does not reflect the original date this article was posted. This article was originally posted in Yonip in June. 16th 2012

 

 

vosbanner

To view more articles in this category click on the Image.

   

 

Sorry, the comment form is closed at this time.